Dekabrın 12-də ADA Universitetinin Biznes məktəbinin biznes hüquq və biznes etikası üzrə professoru, inklüziv təhsil şöbəsinin rəhbəri Elnur Eyvazov Bakı Kitab Mərkəzində “Motivasiya üçün uğur hekayəsi” adlı mühazirə ilə çıxış etdi.
 
BKM-nin “YÜKSƏL” layihəsi çərçivəsində keçirilmiş mühazirədə BDU-nun tələbələri ilə yanaşı Azərbaycan Respublikası Milli Paralimpiya Komitəsinin üzvləri, habelə Təhsil Nazirliyinin “Bir” Tələbə-Könüllü Proqramının və 1 saylı Sağlamlıq İmkanları Məhdud Gənclərin Peşə Reabilitasiya Mərkəzinin nümayəndələri iştirak etmişlər.
 
Çıxışında anadangəlmə görmə məhdudiyyəti olan mühazirəçi professor uşaqlıq və tələbə illərində təhsil ocaqlarında qarşılaşdığı çətinliklərdən, dünyanın aparıcı universitetlərində aldığı təhsilin həyatına verdiyi töhfələrdən, hüquq sahəsinin xüsusiyyətlərindən, həmçinin Azərbaycanda inkişaf edən inklüziv təhsildən danışdı. Mühazirəçi onu da qeyd etdi ki, zəif görmə qabiliyyətinə baxmayaraq, o həmişə pozitiv, fəal olmağa çalışıb, həyatda hər zaman öndə olmaq üçün öz üzərində işləyib. E. Eyvazov fiziki məhdudiyyətli insanlara cəmiyyətdə özünü ifadə etməkdən çəkinməməyi, tənbəllik etməməyi və heç vaxt ruhdan düşməməyi tövsiyə etdi.
 
Sonra o, görüş iştirakçılarının çoxsaylı suallarını cavablandırdı. Sonda tələbələrə E. Eyvazov tərəfindən məsləhət görülmüş və gələcək seminarlarda müzakirə olunacaq mövzuya dair kitablar adəti üzrə BKM adından hədiyyə olundu.