Bu gün Bakı Kitab Mərkəzində Azərbaycan media məkanında yeni media resurs – Qazet.az xəbər portalının təqdimatı baş tutdu. Qazet.az saytının təsisçisi və baş redaktoru Aynur Kərimova çıxışında vurğuladı ki, bu xəbər resursunun əməkdaşları ölkədə və xaricdə baş verən ən mühüm hadisələri mümkün qədər operativ və peşəkarlıqla işıqlandırmağa çalışacaqlar.
 
A.Kərimova onu da qeyd etdi ki, portal Azərbaycan mətbuatının inkişafına, oxucuların obyektiv və qərəzsiz xəbər ehtiyaclarının ödənilməsi üçün səylərini əsirgəməyəcək.
 
Tanınmış TV aparıcısı Ceyhun Əli, filologiya üzrə elmlər doktoru, professor Qulu Məhərrəmli, “525-ci qəzet” in baş redaktoru Rəşad Məcid, əməkdar artist Bəhram Bağırzadə, Azercell Telekom şirkətinin Korporativ ünsiyyət şöbəsinin rəhbəri Nigar Şıxlinskaya və başqaları Azərbaycan media bazarına qədəm qoyan Qazet.az xəbər saytının əməkdaşlarını təbrik edib fəaliyyətlərində uğurlar arzuladılar, saytın etibarlı bir məlumat mənbəyinə çevriləcəyinə ümid etdiklərini bildirdilər.
 
Çıxış edənlər bu gün Azərbaycanda obyektiv, qərəzsiz, savadlı jurnalistlərə, keyfiyyətli analitik məqalələrə olan böyük ehtiyacın olduğunu bildirildilər. Qeyd edək ki, “Qazet.az” xəbər saytı 1 dekabr 2019-cu il tarixindən fəaliyyətə başlayıb. Saytın səhifələri sosial şəbəkələrdə də fəaliyyətdədir.