Dekabrın 26-da Bakı Kitab Mərkəzində “YÜKSƏL” layihəsi çərçivəsində növbəti mühazirə keçirildi. «Müasir cəmiyyətdə gender problemləri» mövzusunda mühazirəni Bakı Dövlət Universitetinin Gender və psixologiya kafedrasının rəhbəri, professor Rəna İbrahimbəyova təqdim etdi. Mühazirəçi çıxışında cins və gender anlayışı, gender aspektləri və tədqiqatları, transgender anlayışının meydana çıxması və bu kimi mövzulara toxundu.

R. İbrahimbəyova vurğuladı ki, müasir dünyada gender problemləri çox mübahisə doğuran mövzulardan biridir və cəmiyyətdə kişi və ya qadın olmaq yalnız bu və ya digər anatomik xüsusiyyətlərə sahib olmaq deyil, həm də cəmiyyət tərəfindən müəyyən edilmiş bu və ya digər gender rolunu icra etmək deməkdir.

Daha sonra məruzəçi BMT-nin gender statistikası, gender bərabərliyinin əsas sahələri, statistik göstəriciləri, gender meinstriminqi, neytrallığı, stereotipləri, rolları və s. anlayışlar haqqında məlumat verdi. Mühazirə zamanı R. İbrahimbəyova, həmçinin, iştirakçılar arasında interaktiv sorğu aparıb, onun maraqlı nəticələrini açıqladı.

Bakı Dövlət Universitetinin sosial elmlər və psixologiya fakültəsinin tələbələrinin və Təhsil Nazirliyinin “Bir” Tələbə-Könüllü Proqramının üzvlərinin iştirakı ilə keçirilən tədbir maraqlı diskussiya ilə davam etdi. Sonda həmişəki kimi BKM adından iştirakçılara Rəna İbrahimbəyova tərəfindən məsləhət görülmüş, gender probləmlərinə aid kitablar hədiyyə olundu.