Yanvarın 15-də Heydər Əliyev Fondu və Bakı Kitab Mərkəzinin təşəbbüsü ilə yaradılmış və BP Azərbaycan şirkətinin maliyyə dəstəyi ilə həyata keçirilən tələbə və gənclər üçün "YÜKSƏL" layihəsinin rəsmi təqdimatı keçirilib.
 
Tədbirdə ADA Universitet və məktəbinin, Azərbaycan Dillər Universitetinin tələbələri, habelə Təhsil Nazirliyinin “Bir” Tələbə-Könüllü Proqramının üzvləri, Heydər Əliyev Fondunun və BP nümayəndələri iştirak etmişlər.
 
Bir il müddətində reallaşdırılacaq “YÜKSƏL” layihəsi haqqında ətraflı məlumat verərək, Mərkəzin direktoru Günel Rzayeva onun tələbə və gənclərin dünyagörüşünü genişləndirmək, müəyyən bacarıqlarını, fərdi keyfiyyətlərini inkişaf etdirmək üçün çox faydalı olacağına ümidini bildirib.
 
Bu layihənin Heydər Əliyev Fondu tərəfindən dəstəklənməsini və BP Azərbaycan şirkəti tərəfindən maliyyələşdirildiyini vurğulayan G.Rzayeva həmin təşkilatlarının rəhbərliyinə dərin minnətdarlığını bildirib.
 
Tədbirdə çıxış edən BP-nin Azərbaycan, Gürcüstan və Türkiyə (AGT) regionu üzrə əlaqələr, xarici işlər və strategiya üzrə vitse-prezidenti Bəxtiyar Aslanbəyli “YÜKSƏL” layihəsinin uğurlu olacağına və cavanlarda kitaba marağın artmasına inandığını qeyd etdi.
Sonra uşaq və yeniyetmələr psixiatrı Orxan İsgəndərov layihə çərçivəsində «İxtisas seçimi» mövzusunda seminar keçirtdi.
 
Seminar zamanı mühazirəçi ixtisas seçimində nəzərə alınmalı əsas amillər, seçim mərhələsində yol verilən tipik səhvlər, peşə seçimi ilə bağlı statistik göstəricilər barədə danışdı. Mühazirəçi, həmçinin, hüquq, idman, səhiyyə və digər sahələrdə özünü doğrultmaq üçün vacib olan keyfiyyətlərdən bəhs etdi. Sonda iştirakçılara O.İsgəndərov tərəfindən tövsiyə olunmuş kitablar hədiyyə edildi.
 
Qeyd edək ki, “YÜKSƏL” layihəsi çərçivəsində Bakı Kitab Mərkəzində ixtisaslarında yüksək zirvələrə çatmış və gənclərə ilham verə biləcək mütəxəssislər tərəfindən hər həftə aparılacaq müxtəlif mövzularda tələbələr və gənclər üçün ödənişsiz seminarlar təşkil olunur. Hər seminardan sonra tələbələrə mühazirəçi tərəfindən tövsiyə olunan kitablar hədiyyə edilir. BP Azərbaycan şirkəti “YÜKSƏL” layihəsinin sponsoru olaraq bu kitabların alınmasına maliyyə dəstəyi göstərir və bununla da Azərbaycan gənclərinin intellektual inkişafına töhfə verir.