Hər evlənən cütlük “ailə”, hər valideyn olan insan “ata” və ya “ana” ola bilirmi? Valideynlər necə bir övlad böyütmək niyyətindədir: sağlam düşüncəli, öz həyatına dair qərarları özü verə bilən, öz ayaqları üstündə dayanmağa qadir olan şəxsiyyət, yoxsa müti, əmrə müntəzir, nə desən, “baş üstə” deyən qul? Romanın qəhrəmanlarından olan Əşrəf də övladlarına “gələcəyin yatırımı” kimi baxan atalardandır. Nə həyat yoldaşı Leylinin, nə də övladlarının taleyi onu maraqlandırır. Bu səbəbdən qızı Esmeralda da anası Leylinin taleyinə məhkum olub, erkən yaşda ərə verilir. Amma Esmeralda məqsədləri olan, nə istədiyini bilən və haqqını tələb edən qızdır. O, çürük mentalitet qaydalarına, yalnız özünü fikirləşən atanın basqısına boyun əyib oturmaq fikrində deyil.