Müasir Azərbaycan oxucularına Adıgözəl Məmmədovun yaradıcılığı yaxşı tanışdır. İstedadlı publisist, tarixçi və tədqiqatçı uzun illərdir fəal yaradıcılığı ilə seçilir, əsərlərində ölkə tarixinin müxtəlif dövrlərinə yeni baxış bucağından yanaşır, arxiv materiallarına əsaslanaraq hadisə və şəxsiyyətlərin ictimai əhəmiyyətini orijinal şəkildə qiymətləndirir. Onun tədqiqatlarında XX əsrin 40-cı illərindən etibarən Azərbaycanın rəhbər elitasında siyasi cəhətdən yetkin gənclərə üstünlük verilməsi və “Böyük Azərbaycan” ideyasının formalaşması xüsusi yer tutur. Məhz bu dövrdə, 1941-ci ildə Əziz Əliyevin rəhbərliyi ilə azərbaycanlılardan ibarət qrup İrana göndərilmiş, o isə Təbrizə daxil olan 47-ci Ordunun Hərbi Şurasının üzvü seçilmişdir. Bu təyinatda M.C.Bağırovun rolu vurğulanır. Adıgözəl Məmmədovun “Böyük Azərbaycan naminə” adlı yeni tarixi-publisistik və bioqrafik kitabı görkəmli dövlət və partiya xadimi, diplomat və alim Əziz Əliyevin həyat və fəaliyyətinə həsr olunub.