Böyük Azərbaycan şairi və mütəfəkkiri İmadəddin Nəsiminin şəxsiyyəti təkcə ədibin yaşayıb-yaratdığı illərdə (1369-1417) onun müasirlərində deyil, sonrakı yüzilliklərdə də ciddi maraq doğurub və tədqiqat obyekti olub. Kitabda şairin həyatı, doğulduğu və vəfat etdiyi məkan, eləcə də gəzib-dolaşdığı tarixi yerlər, həm Orta əsrlər, həm də nisbətən yaxın dövr müəlliflərinin verdiyi bir çox digər bioqrafik təfsilatlar haqqındakı ən müxtəlif fikirlər araşdırılır. Müəllif şairin irsinin öyrənilməsində XIX əsrin sonları XX əsrin əvvəllərində irəli sürülmüş və XX yüzilliyin ortalarında ölkənin bütün aparıcı alimləri tərəfindən qəbul edilmiş vahid tədqiqat konsepsiyasının məqsədəuyğunluğunu qeyd edib. Bu konsepsiya İmadəddin Nəsiminin Azərbaycan xalqına mənsubluğunun danılmaz fakt olduğunu dünya şərqşünaslığının diqqətinə çatdırmaq üçün şairin yaradıcılığının tarixi-coğrafi aspektdə: Yaxın Şərq (türk), Azərbaycan, nəhayət, Şirvan kontekstində araşdırılmasını nəzərdə tutur.