İngilis ədəbiyyatı müəllimi Leda illərini işinə və iki qızına həsr etmiş, orta yaşlarında bir qadındır. Qızları böyüyüb Kanadada yaşayan atalarının yanına köçəndə Leda ilk dəfə uzun illərdən sonra heç kim və heç nə üçün cavabdeh olmadığının fərqinə varır, gözlənilməz olduğu qədər yeni də olan bu hisslər onu ağuşuna alır: yüngüllük və azadlıq. Bundan güc alaraq İtaliyanın cənubunda, dəniz kənarında uzun bir yay tətili keçirməyə qərar verir. Günlərini günəşlənməklə, üzməklə, kitab oxumaqla və yarımçıq işlərini tamamlamaqla keçirmək istəyir. Ancaq sakit başlayan bu tətil getdikcə izaholunmaz bir narahatlığın kölgəsində qalır… Sahildə qarşılaşdığı bir ailə – Nina və balaca qızı Elena təsadüfən Ledanın həyatına daxil olur və onun qurduğu sakit nizamı alt-üst edir. Gənc ana ilə qızı arasındakı münasibət Ledanın yaddaşında illərdir ki, susdurduğu xatirələri oyadır. Elena Ferrante analığın toxunulmazlıq mifini dağıdır və bizi etiraf etməyə cəsarət etmədiyimiz hisslərlə üz-üzə qoyur.