Cəlil Məmmədquluzadənin "Bütün əsərləri" üçcildliyinin II cildinə yazıçının müxtəlif illərdə qələmə aldığı felyetonları daxil edilmişdir. Mirzə Cəlil böyük yazıçı və dramaturq olmaqla yanaşı, ömrünün mühüm bir hissəsini redaktorluq və jurnalistikaya həsr etmişdir. O, ölməz “Molla Nəsrəddin” jurnalını yaratmaqla yanaşı, publisistikanın inkişafına mühüm töhfə vermiş, dəyərli məqalələr və felyetonlar qələmə almışdır. Felyeton yazıçının ən çox müraciət etdiyi janrlardan biri olmuşdur. Xalqın həyatını dərindən bilməsi, cəmiyyətdəki ictimai nöqsanları və ziddiyyətləri dəqiq təhlil etmək bacarığı, iti müşahidə qabiliyyəti və güclü yumor hissi Mirzə Cəlili bu janrın görkəmli ustalarından birinə çevirmişdir. Bu cilddə toplanmış felyetonlar vasitəsilə yazıçının bədii-publisistik üslubu, satirik təfəkkürü və dövrün ictimai həyatına münasibəti ilə yaxından tanış olmaq mümkündür.