Bu çətin dünyada, qədimdən qədim dünyada, zaman-zaman həqiqətlərin yalanlara, yalanların həqiqətlərə qalib gəldiyi dünyada qalib olmaq da var, məğlub olmaq da. Bəzən məğlubiyyət heç də uduzmaq deyil, sadəcə, yolun sonunadək getməməkdir. Qazananlar yarı yoldan qayıdanlar deyil, sonadək mübarizə aparmağı bacaranlardır. Bütün nağılların sonunda xeyir şərə qalib gəlir, işıq qaranlığı yarıb keçir, yaxşılıq pisliyi susdurur. “Üç sehrli inci”nin qəhrəmanı da düşdüyü yolun çətinliklərindən qorxub geri dönmür, ustanın nəsihətlərini sonunadək, əzm və qəhrəmanlıqla yerinə yetirir, yolundakı bütün maneələr fürsətə, düşmənlər dosta çevrilir. Nəhayət…