Böyük Nizaminin həyat və yaradıcılığına həsr olunmuş monoqrafiyanız mənə çox yaxşı təsir bağışladı. Nizami yaradıcılığı bir dəryadırsa, siz dəryadan inci yığan son dərəcə zəhmətkeş, səbirli və mahir bir qəvvas kimi hərəkət etmiş, dərin elmi təsir bağışlayan gözəl monoqrafiyanızı “Xəmsəˮnin on minlərlə misraları arasından müdrik və mənalı beytlərlə rövnəqləndirmisiniz. Monoqrafiyanızda mənə çox xoş gələn odur ki, Nizami əsərlərinin məna və mündəricəsi, ədəbiyyat tarixindəki yeri və əhəmiyyəti onların bədii-estetik xüsusiyyətləri ilə üzvi vəhdətdə tədqiq olunur, “Xəmsəˮnin doğma xalqın həyatı, mənəvi aləmi və xalq yaradıcılığı ilə əlaqəsinə aid fikirlərinizlə tamamilə şərikəm.