Homer qədim yunan ədəbiyyatı, Nizami orta əsr Azərbaycan poeziyası, Şekspir İntibah dövrü ingilis ədəbiyyatı, Puşkin isə rus ədəbiyyatı üçün hansı mövqeyə malikdirsə, Dante də İtaliya ədəbiyyatında eyni dərəcədə mühüm yer tutur. İtalyan ədəbi dilinin banisi hesab olunan bu böyük şairin yaradıcılığı Avropa ədəbiyyatının inkişafına əhəmiyyətli təsir göstərmişdir. Dantenin yaradıcılığının zirvəsi hesab edilən «İlahi komediya» poeması yuxu və səyahət motivləri üzərində qurulmuşdur. Əsərdə dini təsəvvürlərə uyğun olaraq üç hissədən – «Cəhənnəm», «Əraf» və «Cənnət»dən ibarət axirət dünyasına səyahət təsvir olunur. Məcazi və rəmzi ifadə tərzi poemanın bütün məzmununa və bədii quruluşuna sirayət etmişdir. Xristianlığın əsas ehkamlarından biri olan Üçlük (üqnum) inancı ilə bağlı üç rəqəmi və onun müxtəlif qatları əsərin həm strukturunda, həm də məzmununda mühüm yer tutur.