Prof. Dr. İsfəndiyar Ağayevin “Cinayət hüququ. Ümumi hissə” adlı fundamental əsəri Almaniyada Leipzig Universiteti Nəşriyyatı tərəfindən nəşr olunub. Uzunillik elmi və pedaqoji fəaliyyətin nəticəsi olan əsərdə Azərbaycan cinayət hüququna yeni elmi baxış təqdim edilir. Cinayət hüququnun Ümumi hissəsinin əsas institutları Alman klassik cinayət hüququ məktəbinin ideyaları, müasir Avropa, xüsusilə Almaniya hüquq doktrinasının yanaşmaları və müqayisəli-hüquqi metod əsasında sistemli şəkildə araşdırılır. Kitabda bu yanaşmaların Azərbaycan cinayət qanunvericiliyi ilə uzlaşdırılmasına xüsusi yer verilir. Əsərin elmi bazasını əsasən almandilli, həmçinin Oxford və Cambridge kimi aparıcı akademik nəşriyyatların ingilisdilli mənbələri təşkil edir. Azərbaycan dilində belə fundamental hüquq əsərinin Leipzig Universiteti Nəşriyyatında nəşri Azərbaycan hüquq elminin beynəlxalq səviyyədə tanıdılması baxımından xüsusi əhəmiyyət daşıyır.