Əsərdə iki qardaşın taleyindən bəhs edilir. Onlar 1920-ci ildə Almaniyada, eyni ailədə dünyaya gəliblər. Eyni valideynlərin sevgisi və qayğısı ilə böyüyüblər. Lakin qardaşlardan biri yəhudi, digəri isə alman, nasist ideologiyasının təbirincə desək, “xalis ari”dir. Hitler hakimiyyətə gəldikdən sonra ölkədə yəhudilərə qarşı təqiblər və zorakılıqlar başlayır. Bu amansız dövr ailə bağlarını, qardaşlıq münasibətlərini, sevgi və dostluğu ağır sınaq qarşısında qoyur. İki qardaş özlərini çətin və faciəvi seçim qarşısında tapırlar. Onlardan hansı sağ qalacaq? Axı uşaqlar artıq acı həqiqəti dərk edirlər: bir vaxtlar eyni ailənin doğma üzvləri kimi böyüyən bu iki qardaş mənsub olduqları millətlərə görə bir-birinə düşmən kəsilən dünyada yaşamağa məhkumdurlar. “İki qardaş” nasizmin getdikcə qatılaşan kölgəsi altında böyüyən iki oğlanın, insanlıq, ailə bağları və qardaşlıq sevgisinin amansız ideologiya ilə üz-üzə qaldığı faciəvi taleyindən bəhs edən təsirli hekayədir.