Üç cilddə nəşr olunan Cəlil Məmmədquluzadənin “Bütün əsərləri” toplusunun birinci cildinə dahi ədibin hekayələri, dram əsərləri (pyesləri) və satirik şeirləri daxil edilmişdir. Mirzə Cəlilin böyük sənətkarlıqla qələmə aldığı hekayə və dram əsərləri Azərbaycan oxucusuna yaxşı tanışdır. Bununla belə, yüksək bədii dəyəri, dərin məzmunu və bənzərsiz sənətkarlığı sayəsində bu əsərlər hər zaman maraqla qarşılanır, dönə-dönə oxunur. Yazıçının hekayələri milli ədəbiyyatımızda kiçik nəsr janrının formalaşmasında və inkişafında müstəsna rol oynamışdır. Dram əsərləri isə Azərbaycan dramaturgiyasının inkişafına mühüm töhfə verməklə yanaşı, milli teatr sənətinin təşəkkülünə və tərəqqisinə də güclü təkan vermişdir. Mirzə Cəlilin satirik şeirləri də ədibin zəngin yaradıcılığının mühüm tərkib hissəsidir. Bu əsərlər özünün kəskin satirası, ictimai məzmunu və bədii xüsusiyyətləri ilə oxucuların diqqətini cəlb edir. Cəlil Məmmədquluzadənin ədəbi irsi özündən sonra gələn nəsil yazıçılar üçün daim zəngin y