Martın 12-də "Regional İnkişaf" İctimai Birliyi (RİİB) və Baku Book Center-in birgə təşkilatçılığı ilə Vətən müharibəsində qazanılan şanlı Qələbəyə və onun tarixinə həsr edilən "Vətən müharibəsi tarixi - Şəxsiyyət faktoru" kitabının çin dilindəki nəşrinin təqdimatı olub.
RİİB-in könüllüləri, Bakıda təhsil alan çinli tələbələr, qazilər, ictimai xadimlərin iştirak etdiyi tədbirdə 44 günlük savaşda əldə edilən Qələbəyə və kitabın ərsəyə gəlməsinə həsr edilən videoçarx nümayiş etdirilib.
Tədbir iştirakçılarını salamlayan Baku Book Center-in direktoru Günel Rzayeva kitabla bağlı təəssüratlarını bölüşərək bildirib ki, hər zaman verdiyi sözə əməl edən cənab Prezident İlham Əliyev xalqına hansı vədi verdisə, onu sona kimi yerinə yetirib. Odur ki, gənclər də cənab Prezidentin dediyi hər sözə sona kimi inanmalı və hər zaman ona dəstək olmalıdır.
Bakı Şəhər İcra Hakimiyyətinin şöbə müdiri Elmin İmanov bildirib ki, gənclərin müzakirəsinə çıxarılan kitab nəinki ölkəmizdə, eyni zamanda ölkə xaricində oxucu və ekspertlərin böyük marağına səbəb olduğundan Azərbaycan, türk, ingilis, rus, ərəb, fars və çin dillərində nəşr edilib. Hazırda kitabın urdu dilində tərcüməsi üzərində işlər davam edir.
Tədbir RİİB-in nümayəndəsi Murad Qasımlı, Vətən müharibəsi qazisi Qadir Daşdəmirov, ölkəmizdə təhsil alan çinli tələbənin çıxışları ilə davam edib. Gənclərin böyük marağına səbəb olan tədbirin sonunda kiçik konsert təqdim edilib.