H.Kissincerin “Dünya nizamı”nı düzgün qiymətləndirmək üçün onun bu əsərə qədər yazdığı işləri, ələlxüsus da “Diplomatiya” kitabını oxumaq çox faydalı olardı. Onda aydın olardı ki, “yazıya pozu yoxdur” zərb-məsəli Kissincer üçün heç bir əhəmiyyət kəsb etmir. O, qulluğunda durduğu “dünya nizamı”na zaman-zaman dəyişən beynəlxalq şəraitə adaptasiya olunmuş xidmət göstərmək üçün mövqeyini, baxışlarını, dostları və düşmənləri dəyişməyə həmişə hazır olmuşdur. Hazırda yaşı 100-ə yaxınlaşan Kissincerin mükafatlar çələngi üzərində rahatlanmaq vaxtı çoxdan yetişsə də, o, fəal siyasətdən, diplomatiyadan uzaqlaşmamışdır. Öz “Dünya nizamı”nda Yaxın Şərq, Ukrayna, Suriya, İran, Şimali Koreya və digər “qaynar” qlobal problemlərə işıq salan Kissincer Birləşmiş Ştatların xarici siyasətini sadəcə gözəl bilmir, həm də onu müəyyən edir.