“YÜKSƏL” layihəsi çərçivəsində «Azərbaycan mövzusu xarici mediada» adlı vebinar keçirildi


05.08.2020 386

news-detail

Avqustun 5-də tanınmış jurnalist, tədqiqatçı, siyasi elmlər üzrə fəlsəfə doktoru Aynur Bəşirli «Azərbaycan mövzusu xarici mediada» mövzusunda tələbələr üçün növbəti vebinar keçirdi. 
 
Online mühazirə Heydər Əliyev Fondunun və Bakı Kitab Mərkəzinin təşəbbüsü və BP şirkətinin maliyyə dəstəyi ilə gerçəkləşən “YÜKSƏL” layihəsi çərçivəsində gerçəkləşib.
 
Vebinarda ölkəmizin imicinin, portretinin xarici mətbuatda formalaşmasına nəzər salınıb. 
 
Mühazirəçi qeyd etdi ki,  kütləvi informasiya vasitələri xalqların, dövlətlərin, millətlərin imicinin yaranmasında, nüfuzunun artmasında mühüm rol oynayır. Medianın ötürdüyü mesajlar, verdiyi çərçivələr (media framing) insanların beynində hadisələrin, millətlərin müəyyən portretlərinin yaranması üçün zəmin yaradır.
 
Mühazirəçinin sözlərinə görə, bu mesajlar təkrarlandıqca, tezliyi çox olduqca, həmin portret də bir o gedər sürətlə yaranır. “Və ən maraqlısı odur ki, bir dəfə yaranmış portreti, çərçivəni daha sonra dəyişmək çox çətindir. Beləliklə, burada medianın gücü bir fırçaya bənzəyir”. 
 
A. Bəşirli ölkəmiz müstəqilliyini bərpa etdikdən sonra xarici mətbuatda ölkəmiz və xalqımız barədə müəyyən obraz yaradıb. Müxtəlif  mesajlar əsasında illər ərzində yaranmış bu obraz əsas götürülür və insanların Azərbaycan barədə aldıqları sonrakı bütün məlumatlar və xəbərlər bu obraza əsaslanaraq  oxucu tərəfindən mənimsənilir. 
 
ZOOM platforması vasitəsilə keçirilən mühazirəyə 50 nəfərədək tələbə qoşulmuş, onların arasında Bakı Dövlət Universiteti,  Xəzər Universiteti, Azərbaycan Respublikası Prezidenti yanında Dövlət İdarəçilik Akademiyası,  ADA, Bakı Slavyan Universiteti,  habelə Təhsil Nazirliyinin “Bir” Tələbə-Könüllü Proqramının nümayəndələri olub.
 
İştirakçılar Aynur Bəşirli tərəfindən tövsiyə olunmuş kitabları Bakı Kitab Mərkəzinə yaxınlaşıb, tələbə vəsiqələrinin əsasında əldə edə bilərlər.


Sizə necə kömək edə bilərik?
Onlayn dəstək