“AGILE” həyat: müvəffəqiyyətə aparan metodika” adlı vebinar keçirilib


22.07.2020 347

news-detail

İyulun 22-də BP şirkətinin maliyyə dəstəyi ilə reallaşdırılan “YÜKSƏL” layihəsinin çərçivəsində PAŞA Bankın korporativ əlaqələr üzrə direktoru Sona Abbasova “AGILE” həyat: müvəffəqiyyətə aparan  metodika” adlı vebinar (online mühazirə) keçirib. 
 
Həyatımızda baş verən dəyişikliklərə nə qədər tez uyğunlaşa bilirik? Yeni tezdəyişən dünyamızın tələblərinə nə dərəcədə sürətlə və çevik cavab verə bilirik? Gördüyümüz işin keyfiyyətinə zərər vermədən qarşımızda qoyduğumuz məqsədə necə çatmaq olar?  On beş ildən sonra özümüzü hansı zirvələrdə görürük və bu zirvələrə necə çatmaq olar? Bu və digər sualları cavablandıran mühazirəçi bu istiqamətdə insanlara kömək edə bilən “Agile” (Çevik) biznes metodologiyasının mahiyyətindən, rolundan danışdı.
 
S. Abbasova qeyd etdi ki, “Agile” proqram təminatlarının hazırlanmasını daha effektiv idarə etmək üçün bir metodika olaraq ortaya çıxsa da, onu gündəlik həyatımızda balans yaratmaq, qarşımıza qoyduğumuz vəzifə və planlarımızı daha uğurla yerinə yetirmək üçün də istifadə etmək olar.  
 
"Agile" metodologiyanın tətbiq etməsi işi sürətləndirməyə, onu bir neçə hissəyə bölməyə və hər bir hissəni müəyyən bir müddət ərzində tamamlamağa imkan yaradır. 
 
“Agile” biznes metodologiyası marketinq, menecment, bank və intellektual sahələrində istifadə olunur, xaricdə uğurla tətbiq olunur, yalnız kiçik şirkətlər deyil, bəzi dövlət qurumları da ondan istifadə etməyə başlayır.
 
ZOOM platforması vasitəsilə keçirilən mühazirəyə 100 qədər tələbə qoşulmuş, onların arasında Bakı Dövlət Universiteti, Xəzər Universiteti, Odlar Yurdu Universiteti, Azərbaycan Respublikasının Prezidenti yanında Dövlət İdarəçilik Akademiyası, ADNSU, ADA, Azərbaycan Dillər Universiteti, Bakı Slavyan Universiteti, habelə Təhsil Nazirliyinin “Bir” Tələbə-Könüllü Proqramının nümayəndələri olmuşdur.
 
İştirakçılar Sona Abbasova tərəfindən tövsiyə olunmuş kitabları karantin rejimi bitdikdən sonra Bakı Kitab Mərkəzinə yaxınlaşıb, tələbə vəsiqələrini göstərərək əldə edə bilərlər.