Rusiyanın Ailə Tərbiyəsinə Dəstək Mərkəzinin sakinləri Bakı Kitab Mərkəzini ziyarət etdilər


18.10.2018 658

news-detail

Heydər Əliyev Fondunun dəvəti ilə Azərbaycana gələn Rusiyanın «Наш Дом» («Bizim ev») Ailə Tərbiyəsinə Dəstək Mərkəzinin sakinləri oktyabrın 18-də Bakı Kitab Mərkəzini ziyarət etdilər. 
 
Bakı Kitab Mərkəzi ilə tanışlıq zamanı valideyn himayəsindən məhrum olan uşaqlara burada yaradılan şərait, təqdim olunan müxtəlif kitablar, nəşrlər barədə ətraflı məlumat verildi.
 
Qeyd olundu ki, Heydər Əliyev Fondunun Prezidenti Mehriban xanım Əliyevanın təşəbbüsü və dəstəyi ilə yaradılmış Bakı Kitab Mərkəzinin əsas məqsədi cəmiyyətdə mütaliəyə marağın artırılmasıdır.
 
Bakı tarixinin tədqiqatçısı Fuad Axundov ekskursiya çərçivəsində maraqlı mühazirə ilə çıxış edərək qonaqlara “Bakı XIX əsrin sonunda - XX əsrin əvvəllərində. Köhnə Bakının fenomeni” mövzusunda şəhərimizin zəngin tarixi barədə geniş məlumat verdi.
 
Mərkəzdəki ümumi ab-hava, tədris, uşaq və digər zonalar qonaqlarda çox xoş təəssürat yaratdı, hər kəs bura yenə gəlmək istədiyini bildirdi.
 
Görüşün sonunda uşaqlara Bakı Kitab Mərkəzinin adından hədiyyələr və suvenirlər təqdim olundu.