Bakı Kitab Mərkəzində xarici dillər üzrə ödənişsiz danışıq klubları işə başladı


13.10.2018 1115

news-detail

Oktyabrın 13-də Bakı Kitab Mərkəzi və Creative TK Education Complex-in müştərək «Oxu!» layihəsi çərçivəsində Bakı Kitab Mərkəzində uşaqlar və böyüklər üçün xarici dillər üzrə ödənişsiz «Danışıq klubları» işə başladı. 
 
İngilis, rus, alman, ispan və fransız dilləri üzrə «Danışıq klubları»na qəbul olunmaq üçün sosial şəbəkələrdə, BKM-nin və Creative TK Education Complex-in səhifələrində öncədən elanlar verilmişdir. «Danışıq klublar»ında iştirak etmək üçün yeganə şərt xarici dili orta səviyyədə bilmək idi. 
 
Nəticədə, azərbaycan, ingilis, rus, alman, ispan və fransız dilləri üzrə «Danışıq klubların»a müxtəlif yaş kateqoriyalarında 200-dən çox iştirakçı qəbul olundu. 
 
Bakı Kitab Mərkəzinin tədris zonalarında işə başlayan «Danışıq klubları»nda hər qrupda təxminən 15 nəfər iştirak edir. Söhbət zamanı iştirakçılar xarici dillərdə bədii əsərlərdən parçalar, xəbərlər oxuyur, mətnlərə aid sual verir, müzakirələr aparır, müxtəlif mövzularda dialoqlar qururlar. Söhbətlər peşəkar müəllimələr tərəfindən aparılır.
 
«Danışıq klubları»nın əsas məqsədi insanlarla ünsiyyət bağlayaraq, onlara xarici dilləri tədris etmək, xarici dilinin praktiki istifadəsini mükəmməlləşdirməkdir.
 
Xarici dilləri bilmək müasir dövrün əsas tələblərindən  biridir. Gənclərin dünyagörüşünün formalaşması və həmçinin, iş tapması üçün xarici dilləri bilmək zəruridir.
 
Xarici dilləri öyrənmək üçün insanın söz bazası geniş olmalıdır. Bunun üçün uyğun kitablar alıb oxumaq, bu kitablarda bilmədiyimiz sözləri öyrənib müxtəlif cümlələrdə istifadə etmək, xarici dillərdə xəbərlərə qulaq asmaq lazımdır. 
 
İndiki zamanda internet vasitəsilə dünyanın hər bir nöqtəsindən məlumatları sürətli şəkildə əldə etmək olar. Bu baxımdan da xarici, xüsusilə də ingilis  və rus dilləri çox böyük rol oynayır.
 
Ümid edirik ki, Bakı Kitab Mərkəzi və Creative TK Education Complex-in müştərək «Oxu!» layihəsi çərçivəsində uşaqlar və böyüklər üçün xarici dillər üzrə ödənişsiz «Danışıq klubları» lazımı töhfəsini verəcəkdir.