Bakı Kitab Mərkəzi yeni layihənin icrasına başladı


06.01.2020 213

news-detail

Bakı Kitab Mərkəzi 2020-ci ilin yanvar ayından etibarən BP Azərbaycan şirkətinin dəstəyi ilə yeni "YÜKSƏL" təhsil layihəsinə başlamışdır. Bir il müddətində reallaşdırılacaq layihə tələbə və gənclərin xəyallarını gerçəkləşdirməyə, fərdi keyfiyyətlərini maksimum dərəcədə inkişaf etdirməyə və qabiliyyətlərinə inam qazandırmağa kömək edən bir inkişafa təkan verəcək.
 
Layihənin əsas ideyası gəncləri və tələbələri müxtəlif sahələrdə böyük nəticələr əldə etməyə həvəsləndirməkdir. Layihə çərçivəsində Bakı Kitab Mərkəzində hər həftə ixtisaslarında yüksək zirvələrə çatmış və gənclərə ilham verə biləcək mütəxəssislər tərəfindən aparılacaq müxtəlif mövzularda tam ödənişsiz seminar / mühazirələr təşkil olunacaq.
 
Seminar zamanı mühazirəçilər gənclərin dünyagörüşünü genişləndirmək, onların müəyyən bacarıqlarını inkişaf etdirmək məqsədi ilə praktik məsləhətlər və məlumatlarla bölüşəcək. Mövzudan asılı olaraq, Bakının müxtəlif universitetlərinin, peşə məktəblərinin müvafiq fakültələrində təhsil alan tələbələr seminarlara dəvət olunacaq.
 
Seminarlara həmin görüşdə iştirak etmək istəyən gənclər və müəllimlər də qoşula bilər. Hər seminarın sonunda tələbələrə mühazirəçi tərəfindən tövsiyə olunan 50-ə yaxın kitab hədiyyə ediləcək.
 
“YÜKSƏL” layihəsinin sponsoru olaraq BP Azərbaycan şirkəti bu kitabların alınmasına maliyyə dəstəyi göstərir və bununla da Azərbaycan gənclərinin intellektual inkişafına töhfə verir. Seminarlarda sənətşünas Cahangir Səlimxanov, DSX Hərbi hospitalının baş həkimi Kənan Yusif-zadə, tarixçi Fuad Axundov, Bakı Şəhər Halqasının Marketinq və Kommunikasıya şöbəsinin müdiri Nigar Arpadarai, ADA Universitetinin professoru Elnur Eyvazov, yazıçı və şair İlqar Fəhmi, BDU-nin professoru Rəna İbrahimbəyova, Böyük Britaniyada Azərbaycan Qadınlar Assosiasiyasının təsisçisi və prezidenti Ülviyyə Tağızadə, həkim psixiatr Orxan İsgəndərov, sosioloqlar, politoloqlar, mədəniyyət və incəsənət xadimləri iştirak edirlər.
 
İnanırıq ki, yeni layihə gənc nəslin inkişafına böyük töhfə verəcəkdir.