Bakı Kitab Mərkəzində BP şirkətinin sponsorluğu ilə həyata keçirilən «YÜKSƏL» layihəsi çərçivəsində seminar keçirilib


06.01.2020 162

news-detail

Yanvarın 6-da Bakı Kitab Mərkəzində mütərəqqi və müsbət tərbiyə mövzusunda seminar keçirildi. Seminar Böyük Britaniyada fəaliyyət göstərən Azərbaycanlı Qadınlar Assosiasiyasının rəhbəri, ictimai xadim Ülviyyə Tağızadə tərəfindən aparılmışdır.

 

BP Azərbaycan şirkətinin sponsorluğu ilə həyata keçirilən “YÜKSƏL” layihəsi çərçivəsində təşkil olunan seminarda tərbiyənin mütərəqqi və müsbət üsulları, uşaqların tərbiyəsi ilə bağlı mif və faktlar, təhlükəsiz və maraqlı təhsil mühitinin formalaşdırılması kimi mövzular işıqlandırıldı.
 
Mütərəqqi və müsbət tərbiyə layihəsi haqqında danışan Ülviyyə Tağızadə bu layihənin doktor Aaron Bek tərəfindən hazırlanan idrak-davranış psixoterapiyasına, həmçinin, müxtəlif valideyn seminarlarına, duyğuların öyrədilməsi və qoşma nəzəriyyəsinə söykəndiyini qeyd etdi.
 
Maraqlı diskussiya ərzində uşaqların qadjet və smartfonlardan asılılığı, seçim, həvəsləndirmə və motivasiya kimi vacib mövzular müzakirə olundu. Aparıcı eyni zamanda sərt intizam qaydalarından, emosiya təlimlərindən, müsbət öyrənmə metodlardan da məlumat verdi. Seminar zamanı Ülviyyə Tağızadə tərbiyə problemlərinə, uşaqlarda travmatik stres kimi risk faktorlarına da toxundu, ailənin və ətraf mühitin uşağın tərbiyəsinə təsiri və ünsiyyət problemləri barədə danışdı.
 
Tədbirdə Bakı şəhəri üzrə Təhsil İdarəsinin nümayəndələri, uşaq psixoloqları, habelə Təhsil Nazirliyinin “Bir” Tələbə-Könüllü Proqramının nümayəndələri iştirak etmişlər. Onlara Ü.Tağızadənin tövsiyə etdiyi mövzuda dair kitablar hədiyyə olundu.