Fuad Axundovun “İosif Orbelinin kitabının yox olması səbəbləri haqqında” əsərinin təqdimatı oldu


14.06.2019 401

news-detail

İyunun 14-də BKM-də “Tarixlə üz-üzə” layihəsi çərçivəsində Prezident Administrasiyasının Xarici KİV və QHT ilə iş sektorunun müdiri Fuad Axundovun “İosif Orbelinin kitabının yox olması səbəbləri haqqında” əsəri ilə bağlı təqdimat keçirilib. Təqdimatda F. Axundov iştirakçılara kitabı haqqında geniş məlumat verib.
 
Tədbirdə, həmçinin, "Qafqaz tarixi" mərkəzinin direktoru Rizvan Hüseynov, tədqiqatçı Elşad Əliyev, Alban-Udi Xristian dini icmasının sədri, geoloq Robert Mobili, Qazaxıstandan və Özbəkistandan gələn qonaqlar çıxış etmişlər. 
 
Qeyd edək ki, Fuad Axundovun əsərində ermənilər tərəfindən Dağlıq Qarabağ ərazisində alban irsinin dağıdılmasına və erməni tarixinin saxtalaşdırılmasına işıq salan erməni-mənşəli şərqşünas alim İosif Orbelinin “Gandzasar və hAvotsptuk yazıları” kitabı haqqında bəhs olunur.
 
Əsərində müəllif qeyd edir ki, uzun illər itmiş hesab olunmuş kitabın nüsxəsi 2011-ci ildə Sankt-Peterburqda tapılmışdır.
 
F. Axundov yazır ki, İ. Orbeli kitabında Dağlıq Qarabağ ərazisindəki Alban abidələrinin məhv edilməsini və qəsdən erməniləşdirilməsini sübut etmişdir.
 
Lakin, kitabı nəşr etdikdən sonra, erməni alim gözlənilmədən onu yaymaqdan imtina edir və bu elmi işinin bütün tirajını geri götürməyə qərar verir.
 
Bu tarixi əsərin dəyərini və vacibliyini vurğulayan Fuad Axundov erməni aliminin bu cür qərar qəbul etməsinin səbəblərini araşdırır və belə qənaətə gəlir ki, Gandzasar monastırının yazılarını öyrənən və ciddi təzyiqə və təhdidlərə məruz qalmış erməni alim İ. Orbeli nəticədə kitabın bütün tirajını məhv etməyə məcbur olmuşdur.