Kamal Abdullanın rumın dilində “Sehrbazlar dərəsi” romanının təqdimatı keçirilib


06.05.2019 326

news-detail

Bu gün Bakı Kitab Mərkəzində məşhur yazıçı, akademik Kamal Abdullanın rumın dilində çap olunmuş “Sehrbazlar dərəsi” (“Cămpia Vrăjitorilor”) romanının təqdimatı keçirilib.
 
Qeyd edək ki, kitab rumın dilinə A.İ. Kuza adına Yassı Universitetinin dosenti Lyudmila Bejenaru və onun tələbəsi İrina Milea tərəfindən tərcümə edilib.
 
Tədbirdə Rumıniyanın Azərbaycandakı fövqəladə və səlahiyyətli səfiri Dan İanku və xanımı, tanınmış alimlər və ictimayi xadimlər, Azərbaycan Dillər Universitetinin müəllim və tələbələri iştirak edib.
 
Kamal Abdulla toplaşanlara romanın yaranma tarixi haqqında danışıb. Müəllif qeyd edib ki, 2006-cı ildə nəşr olunan mistik roman bu günə kimi müxtəlif dillərdə və müxtəlif ölkələrdə çap olunmuşdur.
 
Sonra çıxış edən kitabın tərcüməçisi Lyudmila Bejenaru “Sehrbazlar dərəsi” romanının rumın dilinə tərcümə prosesini müşayiət edən çətinliklərdən danışıb. O, qeyd edib ki, rumın oxucularının və ədəbiyyat tənqidçilərinin böyük marağına səbəb olan roman bu ilin noyabr ayında Avropa naşirlərinin kitab sərgisində təqdim olunacaq.
 
Kitabın təqdimatı müəllif, tərcüməçi və auditoriya arasında maraqlı diskussiya ilə davam edib. Sonra K.Abdulla qonaqlar üçün kitablarını imzalayıb.
 
“Sehrbazlar dərəsi” Azərbaycan ədəbiyyatının postmodern romanı janrının parlaq nümunəsidir. Sarsılmış, qəddar bir dünya fonunda, müəllif romanında həqiqət və gözəlliyin hökm sürdüyü sehrbazların ideal dünyasını yaradır. Kitabda təsvir olunan və gerçək dünyaya qarşı çıxan dərə - ruhun və bütün mənəvi dəyərlərin yaşadığı bir məkandır.