Vladislav Flyarkovskiy: "İnternetin meydana gəlməsi ilə jurnalistika nüfuzunu itirməyə başladı"


01.05.2019 289

news-detail

Mayın 1-də Rusiyanın məşhur televiziya jurnalisti, teleaparıcı, «Rusiya – Mədəniyyət» («Россия-Культура») telekanalının şərhçisi Vladislav Flyarkovskiy Bakı Kitab Mərkəzinin qonağı oldu.


Telejurnalist, əməkdar artist Nərgiz Cəlilova və teleaparıcı Ceyhun Əli hörmətli qonağı tamaşaçılara təqdim etdilər.


Peşəkar jurnalist, müəllif proqramlarının yaradıcısı, ictimai xadim, nüfuzlu televiziya mükafatlarının laureatı Vladislav Flyarkovskiy Başqırdıstanda anadan olmuş, lakin uşaqlıq illərini Bakıda keçirdiyinə görə özünü bakılı adlandırır.


Məşhur müəlliflə görüşdə iştirak etmək üçün Mərkəzə onun pərəstişkarları və telejurnalist peşəsi ilə maraqlananlar gəlmişdir.


"İlk dəfədir ki, məni Bakıda bu qədər insan qarşılayır”, deyən V. Flyarkovskiy, qonaqları salamladı və "Автобиографика" adlı foto-kitabından doğma şəhərinə həsr olunmuş fraqmenti oxudu.


Daha sonra o, ailəsindən, foto sənətinə olan marağından, Bakı və Qüds daxil olmaqla sevimli şəhərlərindən danışdı.


Tamaşaçıların çoxsaylı suallarını cavablandıran Flyarkovskiy, həmçinin, televiziya karyerasının başlanğıc mərhələsindən, vaxtilə məşhur olan "Vzglyad" (“Baxış”) proqramında fəaliyyətindən danışdı, müasir televiziyanın problemlərinə toxundu və sosial şəbəkələrə öz münasibətini bildirdi.


V. Flyarkovskiy qeyd etdi ki, İnternetin gəlməsi ilə jurnalistika nüfuzunu itirməyə başladı. "Bir milyon yarım bloqer müstəsna məlumatın sahibi ola bilməz. Məlumat birindən digərinə ötürülür, bir sıra dəyişikliklərə məruz qalır və dezinformasiyaya çevrilir", deyə telejurnalist fikrini tamamladı.


V. Flarkovskiy ilə görüşün mövzusu təkcə televiziya məsələləri ilə məhdudlaşmadı. Tədbirə gələnlər qonağa müxtəlif mövzularda suallar verirdi. İki saat davam edən görüş xüsusilə tamaşaçılara unudulmaz anlar yaşatdı.