Londonda Azərbaycan səfirliyində “Cry” toplusunun təqdimatı oldu


25.04.2019 128

news-detail

Aprelin 25-də Londonda Azərbaycanın Böyük Britaniyadakı səfirliyi, Azərbaycan Qadınlar Assosiasiyası (AWA UK) və Bakı Kitab Mərkəzinin dəstəyi ilə “Cry” (“Ağı”) kitabının təqdimatı keçirilmişdir. 
 
Kitaba yazıçı Günel Anarqızının “Qarabağ hekayələri” və şairə Leyla Bəyimin “Qarabağ şikəstəsi" adlı poeması daxildir. 
 
Tədbiri Azərbaycanın Böyük Britaniyadakı fövqəladə və səlahiyyətli səfiri Tahir Tağızadə açaraq "Ağı" kitabında bəhs olunan Qarabağ mövzusunun əhəmiyyəti və aktuallığı haqqında danışaraq kitabı ərsəyə gətirən müəlliflərə və nəşr edən Bakı Kitab Mərkəzinə təşəkkürünü bildirdi. Daha sonra AWA-nın rəhbəri Ülviyyə Tağızadə toplaşanları salamlayaraq bu layihənin gerçəkləşməsinin Böyük Britaniyadakı Azərbaycan Qadın Assosiasiyası üçün də önəmli hadisə olduğunu vurğuladı. 
 
Şairə Leyla Bəyim layihənin özəyində bütün dünya azərbaycanlılarının birləşməsi və ən əsası analarımızın haqq və ədalət səsinin hər yerdə duyulması ideyasının dayandığını diqqətə çatdırdı. Yazıçı Günel Anarqızı isə çıxışında belə bir kitabın ərsəyə gəlməsində əməyi olan hər kəsə minnətdarlığını bildirdi, ancaq eyni zamanda onu da qeyd etdi ki, kaş biz önəmli mövzulardan bəhs edən başqa kitabların təqdimatlarına yığışardıq, Qarabağ problemi isə öz ədalətli həllini tapıb yeni-yeni əsərlərdə artıq aktuallığını itirmiş bir mövzuya çevrilərdi. 
 
Tədbirin sonunda BP şirkətinin London ofisinin qlobal biznes xidmətlərində insan qaynaqları üzrə direktor Leyla Novruzova və Londondakı TEAS nəşriyyat evinin redaktoru Nil Vatson Günel Anarqızı və Leyla Bəyimin əsərlərindən parçalar səsləndirdilər.