“Məhəbbətlə doğulmuşam. Ədilə Hüseynzadə” kitabının təqdimatı keçirilib


20.04.2019 134

news-detail

Aprelin 20-də Bakı Kitab Mərkəzində musiqişünas, pedaqoq, əməkdar incəsənət xadimi, professor Zümrüd Dadaşzadənin müəllifi olduğu “Məhəbbətlə doğulmuşam. Ədilə Hüseynzadə” adlı kitabın təqdimatı keçirilib.
 
Kitab görkəmli bəstəkar və pedaqoq, Azərbaycanın ilk qadın bəstəkarlarından biri, Üzeyir Hacıbəylinin son sevimli tələbəsi Ədilə Hüseynzadənin zəngin həyat və yaradıcılıq yolunu işıqlandırır.
 
Tədbiri giriş sözü ilə BKM-nin direktoru Günel Rzayeva açdı.
 
Milli Konservatoriyanın elmi işlər üzrə prorektoru, professor Lalə Hüseynova və bəstəkar, xalq artisti Elnarə Dadaşova Zümrüd Dadaşzadənin qələmə aldığı kitab haqqında fikirləri ilə bölüşüb, bəstəkarın qoyduğu zəngin musiqi irsindən söhbət açdılar.
 
Sonra çıxış edən kitabın müəllifi professor Zümrüd Dadaşzadə kitabın məziyyətləri haqqında ətraflı danışaraq bu işin maraqlı və heç kimə məlum olmayan detalları haqqında xəbər verdi. Musiqişünas bildirdi ki, kitabda Ə. Hüseynzadənin musiqiyə gəlişi, onun ailəsi haqqında məlumat, tarixi məqamlar, pedaqoji fəaliyyəti və yaradıcılığı ilə bağlı maraqlı faktlar, həmçinin, bəstəkarın şəxsi arxivindən fotomateriallar yer alıb.
 
Təqdimatın bədii hissəsində xalq artisti Fidan Hacıyeva, beynəlxalq müsabiqələr laureatı, pianoçu Səidə Tağızadə və əməkdar artist Aleksey Miltıxin ifasında bəstəkarın əsərləri səsləndirildi. Sonda müəllif qonaqlar üçün kitabını imzaladı və qonaqlara hədiyyə etdi.