BKM-də aprel döyüşlərinin 3 illiyinə həsr edilən poçt markalarının təqdimatı olub


03.04.2019 186

news-detail

Aprelin 3-də Bakı Kitab Mərkəzində Nəqliyyat, Rabitə və Yüksək Texnologiyalar Nazirliyinin tabeliyində fəaliyyət göstərən "Azərmarka" şirkəti tərəfindən "Aprel döyüşləri - 2016. Lələtəpə" adlı poçt markaları və birinci gün zərflərinin təqdimatına həsr edilən tədbir keçirilib.

Tədbirdə 100 ədəd birinci gün zərfi xüsusi hazırlanmış xatirə ştempeli ilə möhürlənərək satışa çıxarılıb.

Nazirliyin təşəbbüsü və "Zəfər" İctimai Birliyinin rəhbəri Sevinc Orucovanın iştirakı ilə hazırlanmış markalar işğal olunmuş Dağlıq Qarabağ ərazisində 2016-cı il aprelin 1-5-də Azərbaycan və Ermənistan silahlı qüvvələrinin təmas xəttində baş vermiş döyüşlərin 3 illiyinə həsr edilib.

«Azərmarka» şirkətinin direktoru Leyla Güləliyeva qeyd edib ki, markaların buraxılmasında əsas məqsəd Azərbaycan ordusunun işğal olunmuş ərazilərdəki uğurlu əməliyyatlardan biri sayılan Aprel döyüşlərində yüksək şücaət nümayiş etdirərək, Vətən uğrunda canından keçmiş zabit və əsgərlərin xatirəsini əbədiləşdirməkdir.

Markanın üzərində qrafik şəkildə hərbi kamuflyaj fonunda Aprel döyüşlərinin ən əhəmiyyətli uğuru sayılan Lələtəpə yüksəkliyi, təpənin üzərində Azərbaycan bayrağı təsvir olunub. Səkkiz markadan ibarət kiçik vərəq şəklində hazırlanmış markaların rəssamı Nəriman Məmmədzadədir.