"Novruzum" müsabiqəsinə yekun vuruldu


13.03.2019 724

news-detail

Fevralın 1-də Bakı Kitab Mərkəzi Novruz bayramına həsr olunmuş, "Novruzum" ümumi adı altında "Ən gözəl rəsm" və "Ən maraqlı nağıl" müsabiqələrinin başlanmasını elan etmişdir. Müsabiqə 5-14 yaş arası uşaqlar arasında keçirilmişdir. Müsabiqədə iştirak etmək üçün martın 1-nə kimi Novruz bayramı mövzusunda rəsm əsəri və ya nağıl yaradıb, Bakı Kitab Mərkəzinə təqdim etmək lazım idi. 
 
Bu müddət ərzində Mərkəzə 250-dən çox rəngarəng rəsm əsəri və 20-dən çox nağıl göndərilmişdi. Bahar təravətli bu əsrarəngiz əsərlərdə uşaqlar Novruzun parlaq rənglərini, adət-ənənələrini məharətlə əks etdirmişlər. 
 
Martın 13-də "Novruzum" adlı rəsm və nağıl müsabiqəsinin qiymətləndirilməsi başa çatdı. Xalqımızın ən sevimli bayramı – Novruza sayılı günlər qalanda ölkəmizin tanınmış rəssamları, incəsənət xadimləri və ədəbiyyatçılarından ibarət münsiflər heyəti müsabiqələrə təqdim edilmiş bütün əsərlərlə tanış olub, dörd yaş kateqoriyasında qalibləri müəyyən etmişlər. Biz müsabiqənin bütün iştirakçılarına təşəkkürümüzü bildirir və əmin etmək istəyirik ki, heç bir əsər diqqətsiz qalmamışdır.
 
«Novruzum» müsabiqəsinin yekun sərgisi və mükafatlandırma mərasimi martın 19-unda Bakı Kitab Mərkəzində keçiriləcəkdir. 
 
Qeyd edək ki, münsiflər heyətinin tərkibinə rəssam Rəşad Mehdiyev, Müasir İncəsənət Muzeyinin direktoru Xəyyam Abdinov, Müasir İncəsənət Muzeyinin fond şöbəsinin rəhbəri Rəna İbazadə-Məmmədova, Xalça Muzeyinin direktoru Şirin Məlikova, memar Ləman Rzayeva, əməkdar artist Bəhram Bağırzadə, Heydər Əliyev Mərkəzinin departament direktoru Məhəbbət Mehdiyeva, AYB-nin katibi, yazıçı İlqar Fəhmi, AYB-nin uşaq ədəbiyyatı seksiyasının rəhbəri, şair Qəşəm Nəcəfzadə və BKM-nin direktoru, yazıçı Günel Rzayeva daxildir.