“Cry” toplusunun təqdimatı oldu


26.02.2019 105

news-detail

Fevralın 26-da Bakı Kitab Mərkəzinin yeni layihəsi, ingilis dilində nəşr edilmiş “Cry” (“Ağı”) kitabının təqdimatı keçirildi. Kitaba yazıçı Günel Anarqızının “Qarabağ hekayələri” və şairə Leyla Bəyimin “Qarabağ şikəstəsi" poeması daxildir.
 
Layihə haqqında danışaraq, mərkəzin direktoru Günel Rzayeva bu təqdimatın Xocalı soyqırımının 27-ci ildönümüylə bilavasitə bağlı olduğunu qeyd edib. Eyni zamanda, beynəlxalq layihənin 2013-cü ildən etibarən dünyanın müxtəlif ölkələrində xarici dillərdə təqdim edildiyini diqqətə çatdırıb.
 
Şairə Leyla Bəyim çıxış edərək, vurğulayıb ki, layihə Azərbaycan-Ermənistan Dağlıq Qarabağ münaqişəsinin və Ermənistanın təcavüzünün həqiqətlərini müxtəlif dillərdə dünya ictimaiyyətinə çatdırmaq missiyasını daşıyır.
 
Tədbirdə BP Azərbaycan şirkətinin modernizasiya şöbəsinin rəhbəri Rəşad Bayramovun ifasında G. Anarqızının “Atama məktub” hekayəsi səslənib. Həmçinin, Azərbaycan – Gürcüstan - Türkiyə biznes inkişaf proqramının məsləhətçisi Ayla Əzizova L. Bəyimin “Qarabağ şikəstəsi" poemasından parçalar oxuyub. 
 
Tədbirdə çıxış edən xalq yazıçısı Anar, Maqsud İbrahimbəyov Yaradıcılıq Mərkəzinin direktoru Anna İbrahimbəyova, xalq artistləri Fəxrəddin Manafov, Şükufə Yusupova, Vaqif Əsədov, Mahriban Zəki, əməkdar artist Nərgiz Cəlilova, ASAN Radionun direktoru Emin Musavi, PwC şirkətin nümayəndəsi Zarina Zeynalova layihə haqqında fikirləriylə bölüşüb və müəlliflərin əməyini yüksək qiymətləndirib.
 
Gecədə, həmçinin, Respublika və Beynəlxalq müsabiqələrin qalibləri, pianoçu Vüsal Aydəmirovun və tarzən Ibrahim Babayevin tədbir üçün xüsusi olaraq bəstələdikləri “Qarabağ” kompozisiyası müəlliflər tərəfdən ilk dəfə səsləndirildi.
 
Qeyd edək ki, kitab satışından əldə edilən gəlir xeyriyyə məqsədiylə istifadə olunacaq.