Yazıçı Natiq Rəsulzadə ilə görüş keçirilib


18.02.2019 317

news-detail

Fevralın 18-də "Yazıçı ilə dialoq" layihəsi çərçivəsində BKM-də məşhur yazıçı, kinodramaturq Natiq Rəsulzadə ilə görüş keçirilib.
 
Yazıçı görüşün təşkil olunmasına görə Bakı Kitab Mərkəzinə öz təşəkkürünü bildirib. Daha sonra N. Rəsulzadə tələbəlik illərindən, jurnalist fəaliyyətindən, çoxşahəli yaradıcılığından danışaraq, həm də auditoriyanın suallarına cavab verib.
 
Görüşdə, həmçinin, Natiq Rəsulzadənin qələm dostu, xalq yazıçısı Çingiz Abdullayev, Azərbaycan Memarlar İttifaqının sədri Elbəy Qasımzadə, tarzən, xalq artisti Ramiz Quliyev, xalq rəssamı Rafiq Əziz, dirijor, xalq artisti Yalçın Adıgözəlov yazıçı haqqında xoş sözlər deyib, xatirələri ilə bölüşüblər. 
 
Tədbir çərçivəsində yazıçı oxucular üçün kitablarını imzalayıb. Səmimi şəraitdə keçən görüş hamıda xoş əhval yaradıb.
 
Qeyd edək ki, Azərbaycanın əməkdar incəsənət xadimi, "Şöhrət" ordenli Natiq Rəsulzadə 50-dən çox kitabın, teatr üçün pyeslərin, bədii filmlər üçün ssenarilərin müəllifidir. Onun əsərləri bir çox xarici dildə dünyanın müxtəlif ölkələrində çap olunub və nüfuzlu milli və beynəlxalq ədəbi mükafatlara layiq görülüb.