İsveç detektiv aləminə maraqlı səyahət


15.02.2019 341

news-detail

Fevralın 15-də İsveç Krallığının Azərbaycandakı səfirliyinin təşəbbüsü ilə BKM-də detektiv janrı üzrə mütəxəssis, fotoqraf Aydın Sadıxovun “İsveç detektivi” adında seminarı keçirilib. Tədbir çərçivəsində A. Sadıxovun İsveçin paytaxtı Stokholm şəhərinin baxımlı yerlərinə həsr olunmuş fotosərgisi də nümayiş olunub. Giriş sözündə İsveç Krallığının Azərbaycandakı səfirliyinin ticarət və mədəniyyət məsələləri üzrə katibi Sirus Rüstəmov Bakı Kitab Mərkəzinə tədbirin keçirməsində dəstək olmasına görə minnətdarlığını bildirib və səfirlik tərəfindən ölkəmizdə həyata keçirilən mədəni və xeyriyyə layihələrindən qısa məlumat verib. Seminarda A. Sadıxov Isveç detektivlərinin yaranma tarixindən, məziyyətlərindən, detektiv janrında çəkilmiş İsveç və Hollivud filmlərindən, bu janrda yazan May Şövall və Per Valö, Mariya Lang, Kamilla Lekberq, Erik Aksel Sund, Osa Larsson, Yens Lapidus, Devid Lagerkrants və başqa İsveç yazıçılarından iştirakçılara ətraflı məlumat verib. A. Sadıxovun maraqlı seminarı video təqdimat ilə müşayiət olunub. Seminarın sonunda iştirakçılara məntiqi rebusu çözmək təklif edilib. Bu maraqlı məsələni həll edənə və tədbirə gələn hər kəsə İsveç səfirliyi tərəfdən bestseller detektiv romanları hədiyyə olunub.