BKM-də təşkil olunmuş xeyriyyə bazarından yığılan vəsait ünvanına çatdırıldı


23.01.2019 775

news-detail

Məlum olduğu kimi ötən ilin noyabr-dekabr aylarında Bakı Kitab Mərkəzində uşaqlar üçün ödənişsiz dekorativ-tətbiqi sənət dərnəkləri təşkil olunmuşdur. Dərs zamanı uşaqlar müxtəlif əşyalar düzəltmiş və həmin məhsullar Yeni İl öncəsi BKM-də təşkil olunmuş xeyriyyə bazarında satışa çıxarılmışdır.
 
Eyni zamanda, bazarda bir çox məşhur incəsənət və ədəbiyyat xadiminin, adi vətəndaşların əl işləri də satışa çıxarılmışdır. 1 ay müddətində davam edən bazardan əldə edilən vəsait hesabına bir neçə uşaq evi üçün müxtəlif hədiyyələr, əqli inkişaf üçün zəruri vəsait, kitablar və ərzaq malları alınmışdır.
 
Yanvarın 21-də və 23-də Bakı Kitab Mərkəzinin əməkdaşları Qaradağ rayonunda yerləşən “Müşviq” Əlil Uşaqlara Yardım İctimai Birliyini və Azərbaycan Uşaqlar Birliyinin nəzdində fəaliyyət göstərən Uşaq Sığınacağı Reinteqrasiya Mərkəzini ziyarət etmiş, burada qalan uşaqlarla görüşmüş, onlarla xoş və pozitiv vaxt keçirmişlər.
 
Kimsəsiz uşaqlara sovqat aparan BKM- nın əməkdaşları həm də uşaqların əyləncə və sevinclərinə şərik olmuşlar.